Anderthalf Liter jode Fleischbröh
Jekoch Rindfleisch
150 - 200 Jramm Jäsch
(nit de decke Jäsch "Kälverzäng")
E Bündche Zuppejröns
Drei decke Ädäppele
Salz
De jewäsche Jäsch ovends en der Fleischbröh enweiche. Am nökste Dach op et Für setze un anderthalf Stund bei kleiner Flamm köchele loße. Dann dat kleinjeschneddene Zuppejröns un die en Stöckelcher jeschneddene Ädäppele dobeidun. Noh ner halve Stund es de Zupp fädich. Dann deit mer dat jeschneddene Fleisch noch ens flöck met opkoche un schmeck de Zupp met Salz av.
***
Wo mer Jäsch schött, kann kei Koon lijje!