Prummetaat

För der Deich:
E Pund Mähl
E Päckche Trockenheff
50 Jramm Botter
50 Jramm Zucker
Ne Veedel Liter Milch
En Ei, Salz, en afjerevvene Zitroneschal

För drop:
Drei bes vier Pund Prumme, Zucker, Kaniel

Die Sache för der Deich wäde met der anjewärmte Milch verarbeit. Dä Deich muß dann zojedeck wäde, bes hä richtich hujekumme es. Hä weed dann noch ens met de Häng öntlich durchjeknedd un sulang met Mähl bestreut, bes hä nit mih kläv. Dann weed hä op nem enjefett Backblech usjerollt un met denne usjekeente und jeveedelte Prumme belaat. Dat muß dann en Zicklang sing Rauh han un wärm ston. Dann 30 Minutte bei 200 Jrad backe. Wann die Taat fädich es, kann mer se noch met jet Zucker un Kaniel bestreue.

***

Jebacke Prumme es weich Obs!